آئی اے ای اے کے دائریکٹر نے پزشکیان کو مبارک باد پیش کی، منتخب صدر سے ملاقات پر آمادہ ہيں

ایٹمی توانائی کی عالمی ایجنسی کے ڈائریکٹر جنرل رافیل گروسی نے جمعرات کے روز مسعود پزشکیان کو ایران کے صدارتی انتخابات میں کامیابی پر مبارکباد دی اور نو منتخب صدر سے ملاقات کے لیے اپنی آمادگی کا اظہار کیا۔

گروسی کے پیغام میں کہا گیا ہے: میں مسعود پزشکیان کو اسلامی جمہوریہ ایران کا صدر منتخب ہونے پر مبارکباد پیش کرنا چاہتا ہوں۔

انہوں نے مزید کہا: جوہری توانائی کی بین الاقوامی ایجنسی اور ایران کے درمیان تعاون ایک طویل عرصے سے بین الاقوامی توجہ کا مرکز ہے۔ مجھے یقین ہے کہ مل کر کام کرنے سے ہم اس اہم مسئلے پر فیصلہ کن پیش رفت حاصل کر سکتے ہیں۔

گروسی نے اپنے بیان کے ایک اور حصے میں کہا: اس سلسلے میں، میں جلد از جلد ایران کے سفر اور ایران کے صدر مسعود پزشکیان سے ملاقات کے لیے اپنی آمادگی کا اعلان کرنا چاہتا ہوں۔

بین الاقوامی ایٹمی توانائی ایجنسی کے ڈائریکٹر جنرل نے اس سے پہلے ایران کے بارے میں کہا تھا: میرا یقین ہے کہ ہمیں سفارت کاری کی طرف لوٹنے کی ضرورت ہے۔ ہمارے پاس مشترکہ کارروائی کا ایک جامع منصوبہ تھا لیکن آج یہ صرف کاغذوں پر موجود ہے اور کوئی اس پر عمل درآمد نہیں کرتا اور نہ ہی اس پر قائم ہے۔