افغانستان اور پاکستان کے درمیان کشیدگی میں اضافہ

پاکستان ائیرفورس کی جانب سے افغانستان کے مختلف علاقوں میں حملوں کے بعد افغان حکومت نے کہا ہے کہ پاکستان نے اس کی فضائی حدود کی خلاف ورزی کی ہے اور پاکستانی فوج نے کابل پر فضائی حملہ کیا ہے۔ رائٹرز کے مطابق، افغان حکومت نے اعلان کیا کہ پاکستان نے ایک مارکیٹ پر بمباری کی، اور کابل کو نشانہ بنایا۔ افغان حکومت نے اس سلسلے میں ایک بیان جاری کرتے ہوئے خبردار کیا کہ ہے اگر پاکستانی فوج نے کشیدگی میں اضافہ کیا تو نتائج کی ذمہ دار وہ خود ہوگی۔

افغان حکومت نے کہا ہے کہ ہم پاکستان کی طرف سے افغان فضائی حدود کی خلاف ورزی کی شدید مذمت کرتے ہیں اور ہمیں اپنی سرزمین کے دفاع کا حق حاصل ہے۔ افغان ذرائع نے گزشتہ رات اطلاع دی ہے کہ افغان دارالحکومت کابل میں دو زور دار دھماکوں کی آوازیں سنی گئیں۔ سابق افغان صدر حامد کرزئی نے ایک پیغام میں کابل اور پکتیکا، خوست اور ننگرہار کے صوبوں پر پاکستان کے فضائی حملے کو بین الاقوامی قوانین اور افغان خودمختاری کی خلاف ورزی قرار دیا۔