امریکہ میں ایندھن کی قیمتوں کو قابو میں لانے کے لیے، ڈونلڈ ٹرمپ نے ٹیکس سے مستثنیٰ ‘ریڈ ڈیزل’ کے استعمال کی اجازت دے دی۔
رائٹرز کے مطابق، امریکی صدر ڈونلڈ ٹرمپ نے ایندھن کی بڑھتی ہوئی قیمتوں اور اس کے نتیجے میں صارفین پر پڑنے والے دباؤ کے پیشِ نظر، ٹیکس سے مستثنیٰ ڈیزل کی ایک قسم تک رسائی کو وسیع کر دی
ایران کے خلاف امریکہ اور اسرائیل کے تنازع اور روسی ریفائنریز پر یوکرین کے حملوں کے باعث پیدا ہونے والے خلل کے نتیجے میں، امریکہ میں ڈیزل کی قیمتیں تقریباً 6.50 ڈالر فی گیلن کی ریکارڈ سطح پر پہنچ گئی ہیں۔
ایک نئے ایگزیکٹو آرڈر پر دستخط کر کے، ٹرمپ نے "ریڈ ڈیزل” کے استعمال پر پابندیوں میں نرمی کر دی ہے – ایک قسم کا ڈیزل جو سڑک سے باہر کے مقاصد، جیسے زراعت اور تعمیرات کے لیے استعمال ہوتا ہے، جو سڑک کے ایندھن کے ٹیکس سے مستثنیٰ ہے۔
یہ حکم اس ایندھن کے وسیع تر استعمال کی راہ ہموار کرتا ہے اور امریکی محکمہ خزانہ کو ہدایت دیتا ہے کہ وہ 2026 کے اختتام تک وفاقی ڈیزل ٹیکس کی ادائیگی ملتوی کرنے کے عمل میں سہولت فراہم کرے۔
تاہم، ماہرین کا ماننا ہے کہ محض ٹیکس میں کمی امریکی ڈیزل مارکیٹ کو درپیش بنیادی مسئلے کو حل نہیں کر سکے گی، کیونکہ قیمتوں میں یہ نمایاں اضافہ بنیادی طور پر رسد میں کمی، ریفائنری کے نظام میں تعطل اور عالمی سطح پر ذخائر کی کم مقدار کا نتیجہ ہے۔
ڈیزل کا بحران مزید شدت اختیار کر گیا ہے، حالانکہ جی-7 ممالک نے امریکہ کے دباؤ پر اپنے ہنگامی ذخائر سے مجموعی طور پر 10 کروڑ (100 ملین) بیرل خام تیل اور ڈیزل جاری کرنے پر اتفاق کر لیا ہے؛ اس اقدام کا مقصد عالمی ایندھن کی منڈی پر دباؤ کو کم کرنا ہے۔
یہ اقدامات امریکہ میں وسط مدتی انتخابات سے قبل ایسے وقت میں کیے جا رہے ہیں جب ایندھن اور رہن سہن کی بڑھتی ہوئی قیمتیں ووٹرز کے لیے بنیادی تشویش کا باعث بن چکی ہیں، جس سے ٹرمپ انتظامیہ دباؤ کا شکار ہے۔