علی باقری کنی: عالمی برادری اسرائیل کو بین الاقوامی عدالت انصاف کے فیصلوں پر عمل درآمد پر مجبور کرے

ایران کے نگراں وزیر خارجہ علی باقری کنی نے اقوام متحدہ کے سیکریٹری جنرل کے نام خط میں عالمی برادری سے مطالبہ کیا ہے کہ اپنی ذمہ داریوں پر عمل کرتے ہوئے اسرائیلی حکومت کو بین الاقوامی عدالت انصاف کے فیصلوں پر عمل درآمد پر مجبور کرے۔

ارنا کے مطابق علی باقری کنی نے سیکریٹر جنرل انتونیوگتریس کے نام خط میں لکھا ہے کہ اب وقت آگیا ہے کہ عالمی برادری اپنی وحدت کا ثبوت دے اور جارح صیہونی حکومت کو بین الاقوامی عدالت انصاف کے 26 جنوری 2024، 28 مارچ 2024 اور 24 مئی 2024 کے فیصلوں پر عمل درآمد پر مجبور کرے ۔

انھوں نے اپنے مکتوب میں لکھا ہے کہ بین الاقوامی عدالت انصاف نے اپنے 24 مئی 2024 کے فیصلے میں اسرئیلی حکومت کو حکم دیا ہے کہ فوجی حملہ بند کرے اور رفح میں ایسے ہر اقدام سے پرہیز کرے جو فلسطینی عوام کی زںدگی مشکل بناسکتے ہوں اور ان کے قتل کے اسباب فراہم کرتے ہوں اور انسان دوستانہ امداد کے جاری رہنے کی ضمانت فراہم کرے لیکن غزہ اور رفح میں حملے جاری ہیں اور وہاں سے المناک خبریں مل رہی ہیں۔

انھوں نے لکھا ہے کہ اسرائیلی فوج نے اس صریحی حکم کے بعد بھی فضائی اور زمینی حملوں اور فلسطینی عوام کی نسل کشی کا سلسلہ جاری رکھا ہے اور انسان دوستانہ امداد کو نا ممکن بنادیا ہے۔

ایران کے نگراں وزیر خارجہ نے یو این سیکریٹری جنرل کے نام اپنے خط میں لکھا ہے کہ عالمی برادری کا فریضہ ہے کہ بے گناہ فلسطینی عوام کا قتل عام اور صیہونی حکومت کے دیگر جرائم کا سلسلہ فوری طور پر روکے اوراس حکومت کو بین الاقوامی عدالت انصاف کے فیصلوں پر عمل درآمد پر مجبور کرے