ایران کے نائب وزیر خارجہ کاظم غریب آبادی نے میناب پرائمری اسکول پر وحشیانہ امریکی بمباری اور اسکولی بچوں کے قتل عام کی بین الاقوامی عدالتی اداروں میں چارہ جوئی کا اعلان کیا ہے
اسلامی جمہوریہ ایران کے نائب وزیر خارجہ کاظم غریب آبادی نے اتوار 10 اکتوبر کو میناب کے شجرہ طیبہ پرائمری اسکول کے معائنے اور شہدائے میناب کے لواحقین سے ملاقات میں کہا ہے کہ 168 اسکولی بچوں کے قتل عام کے امریکی جنگی جرم کی دستاویزات جمع کرلی گئی ہیں اور تہران میں ایک خصوصی کمیٹی بین الاقوامی عدالتی اداروں میں دائر کرنے کے لئے یہ مقدمہ تیار کررہی ہے۔
انھوں نے کہا کہ شجرہ طیبہ پرائمری اسکول کے 168 بچوں اور ان کے معلمین کا قتل عام بہت بڑا المیہ ہے اور ہم شہدا کے لواحقین کے غم میں برابر کے شریک ہیں
کاظم غریب آبادی نے کہا کہ اسکولوں، کالجوں، تعلیمی اداروں اور اسپتالوں پر حملہ بین الاقوامی انسانی حقوق کی کھلی پامالی ہے۔
انھوں نے بتایا کہ وزارت خارجہ، قانونی امور میں صدرمملکت کی معاونت کا ادارہ اور دیگر سبھی متعلقہ ادارے، پوری تندہی کے ساتھ اس کیس پر کام کررہے ہیں۔
کاظم غریب آبادی نے ملک کے دفاع میں صوبہ ہرمزگان کے عوام کے کردار کو خراج تحسین پیش کیا اور قانونی چارہ جوئی کے لئے شہیدوں کے لواحقین کے مطالبات کی مکمل حمایت پر زور دیا ۔
انھوں نے کہا کہ اس وحشیانہ جنگی جرم کے مرتکبین اور سبھی ذمہ داروں کے خلاف قانونی چارہ جوئی اور انہیں کیفر کردار تک پہنچانے میں کسی بھی کوشش سے دریغ نہیں کیا جائے گا۔