امریکی یک طرفہ پسندی قابلِ قبول نہیں، دنیا کو کثیرالجہتی نظام کی طرف بڑھنا چاہیے: صدر پزشکیان کی اپنے روسی ہم منصب سے گفتگو
ایران کے صدر مسعود پزشکیان نے روسی صدر ولادیمیر پوتین سے ملاقات کے دوران کہا ہے کہ دنیا اور خطے میں کثیرالجہتی نظام کو فروغ دینا ضروری ہے اور عالمی سطح پر امریکی یک طرفہ پسندی کے پھیلاؤ کو قبول نہیں کیا جا سکتا۔
صدر پزشکیان نے کہا کہ امریکہ اپنی پالیسیاں اور نظریات دوسرے ممالک پر مسلط کرنے کی کوشش کر رہا ہے اور اب وہ اپنے داخلی سیاسی فیصلے بھی دیگر ممالک پر تھوپنا چاہتا ہے۔
ایرانی صدر نے امریکہ کے ساتھ مذاکرات کا ذکر کرتے ہوئے کہا کہ ایران بات چیت کے عمل میں شریک ہے، تاہم امریکہ کے ساتھ ہر مرتبہ مذاکرات کے بعد دوبارہ حملے کیے جاتے ہیں۔
انہوں نے بتایا کہ ایران نے اپنی تجاویز پیش کی تھیں جبکہ امریکہ نے بھی نئی تجاویز دی تھیں، جن میں ایران نے ضروری ترامیم کی ہیں۔ ان تجاویز کو حتمی شکل دینے کے بعد متعلقہ رابطہ کاروں کے ذریعے ان پر تبادلہ خیال اور اتفاقِ رائے کی کوشش کی جائے گی۔
مسعود پزشکیان نے خطے اور اقوام متحدہ کے حوالے سے روس کے مؤقف اور امریکی یک طرفہ پسندی کو روکنے کے لیے اس کے اقدامات پر صدر پوتین کا شکریہ ادا کیا۔
انہوں نے مزید کہا کہ ایران کی کوشش ہے کہ جنگ کا خاتمہ ہو اور بین الاقوامی قوانین کے دائرے میں ایرانی قوم کے حقوق کا تحفظ یقینی بنایا جائے۔ تاہم، اگر امریکہ نے یک طرفہ پسندی کی بنیاد پر آگے بڑھنے کی کوشش کی تو یہ عمل قابلِ عمل نہیں ہوگا۔