ایران اور لبنان کی جرات نے اسرائیل کو جنگ میں شکست دے دی ہے: پاکستانی وزیر دفاع
پاکستان کے وزیر دفاع خواجہ محمد آصف نے کہا ہے کہ ایران، لبنان اور فلسطین کی جرات مندانہ جدوجہد نے صیہونیوں کو حتمی شکست سے دوچار کردیا ہے۔
پاکستان کے وزیر دفاع نے خطے میں جنگ بھڑکانے کی سازشوں میں صہیونی لابی کے کردار اور اس میں امریکہ کی شمولیت کا حوالہ دیتے ہوئے کہا کہ خطے کو اسرائیل سے بنیادی خطرہ لاحق ہے؛ تاہم اسلامی جمہوریہ ایران، لبنان اور فلسطین کی جانب سے کی جانے والی جرات جدوجہد کے نتیجے میں صہیونی اس تنازعے میں حتمی طور پر ہارنے والے فریق بن گئے ہیں۔
مغربی ایشیا کی صورتحال کے حوالے سے مقامی میڈیا سے گفتگو کرتے ہوئے خواجہ محمد آصف نے کہا کہ اسرائیل خطے میں جنگوں اور تنازعات کی اصل وجہ اور بدامنی سے فائدہ اٹھانے والا عنصر ہے۔
انہوں نے اس بات پر زور دیا کہ اگرچہ صہیونی لابی امریکہ کو ایران کے ساتھ تنازعے میں گھسیٹنے میں کامیاب ہو گئی تھی، لیکن کوئی بھی فریق اپنے مقاصد حاصل نہ کر سکا؛ بلکہ اس کے برعکس دنیا بھر کی اقوام میں اسرائیل کے خلاف نفرت میں شدت آئی ہے۔
خواجہ آصف نے کہا کہ ایران، لبنان اور فلسطینیوں نے اسرائیل کے خلاف جرات مندانہ جنگ کی اور اسرائیل کی شکست خوردہ حیثیت کو یقینی بنایا ہے۔
انہوں نے یمن میں موجودہ پیش رفت کے حوالے سے تہران کو سعودی عرب کے پیغام کی منتقلی کا دعوی کرتے ہوئے کہا کہ اسلامی جمہوریہ ایران خطے میں کوئی نیا محاذ کھولنے کا خواہشمند نہیں ہے۔
ترکی اور سعودی عرب کے ساتھ مشترکہ دفاعی معاہدے کے حوالے سے پاکستانی وزیر دفاع نے کہا کہ پاکستان سعودی عرب میں مقدس مقامات کے تحفظ کو اپنا فرض سمجھتا ہے، جس کے لیے کسی علیحدہ معاہدے کی ضرورت نہیں ہے۔
انہوں نے مزید کہا کہ اگرچہ وہ سہ فریقی دفاعی معاہدے کی تفصیلات میں مزید نہیں جا سکتے، لیکن ان کا ماننا ہے کہ اب اس معاہدے کو فعال کرنے کا وقت آ گیا ہے۔
ارنا کے مطابق، پاکستانی وزیر اعظم شہباز شریف نےگزشتہ روز علاقائی صورتحال پر ردعمل ظاہر کرتے ہوئے کہا ہے کہ "ہم تمام فریقوں سے اپیل کرتے ہیں کہ وہ انتہائی تحمل کا مظاہرہ کریں اور کشیدگی میں مزید اضافے سے گریز کریں۔
