شام پر اسرائیلی حملے

شام کے جنوب مغربی صوبہ قنیطرہ کے مقامی ذرائع نے روسیا الیوم کے ساتھ ایک انٹرویو میں بتایا کہ اسرائیلی فوج نے گذشتہ شام اس صوبے کے جنوبی مضافات میں تل الاحمر الشرقی کے اطراف کے علاقے کو 8 سے زیادہ سنگین بموں کے ساتھ نشانہ بنایا ہے۔ ذرائع کے مطابق اسرائیلی حملے کھلے علاقوں کے ساتھ ساتھ تل الاحمر الشرقی کے قریب واقع سابق فوجی اڈوں پر بھی انجام پائے جس سے آس پاس کے دسیوں دیہاتوں اور قصبوں میں شدید دھماکوں کی آوازیں واضح طور پر سنی گئیں۔ رپورٹ کے مطابق اس کے ساتھ ساتھ سرحدی علاقوں میں انجام پانے والی اسرائیلی جنگی طیاروں کی نیچی پروازیں بھی شامی شہریوں میں تناؤ اور تشویش کا باعث بنی ہوئی ہیں جبکہ اس پورے علاقے پر چھائے ہنگامی حالات کے باعث ان حملوں سے ہونے والے مالی و جانی نقصان کی تفصیلات موصول نہیں ہوئیں۔