پشاور، دستی بم سے کھیلتے ہوئے دھماکہ، 1 جاں بحق اور تین زخمی
پشاور کے علاقے تھانہ انقلاب کی حدود میں گھر کے باہر سے ملنے والے دستی بم سے کھیلنے کے دوران دھماکا ہوا، جس میں نوجوان جاں بحق جبکہ خاتون اور بچے سمیت تین افراد زخمی ہوگئے۔ تفصیلات کے مطابق تھانہ انقلاب میں ایک گھر پر جرگے کے دوران وقفے کے وقت جب تمام لوگ نماز ادائیگی کے لیے گئے تو اُس وقت زور دار دھماکا ہوا جس سے پورا علاقہ لرز اٹھا۔ دھماکے کی آواز اتنی شدید تھی کہ پورے علاقے میں خوف و ہراس پھیل گیا جبکہ زور دار آواز کی وجہ سے ایک زخمی بیہوش ہوگیا تھا۔ پولیس کے مطابق گھر کو بھی جزوی نقصان پہنچا۔ پولیس کے مطابق گلزار خان نے بتایا کہ وہ سوڑیزئی پایاں کے رہائشی ہیں، ان کا نورشاد اور آیاز خان کے ساتھ گاڑیوں کے مسئلے پر جرگہ تھا اورجرگہ ختم ہونے پر وہ نماز کیلئے مسجد چلے گئے۔ تھوڑی دیر بعد گھر میں اچانک دھماکہ ہوگیا۔
پولیس کا کہنا ہے کہ عینی شاہدین نے بتایاکہ 4 یا 5 سالہ بچہ حسنین گھر کے باہر سے پڑا مبینہ دستی بم گھر لے آیا تھا اور وہ اس کے ساتھ کھیل رہا تھا کہ اچانک زورداردھماکہ ہواجس سے گھر میں موجود 15 سالہ عاطف، 18 سالہ عمران، حسنین اور چالیس سالہ خاتون زخمی ہوئے جنہیں طبی امداد کیلیے اسپتال منتقل کیا گیا۔ ایک زخمی عاطف زخموں کی تاب نہ لاتے ہوئے دم توڑ گیا ۔ مدعی کے مطابق ان کا کسی کے ساتھ کوئی دشمنی نہیں ہے۔ بی ڈی یوٹیم نے جائے وقوعہ سے بم کے ٹکرے ودیگراہم شواہد اکٹھی کرلی جبکہ پولیس نے 3/4ایکسپلوسیو سبسٹانسز ایکٹ کے تحت دھماکے کی ایف آئی آر درج کرلی اور مختلف پہلوﺅں سے واقعہ کی تفتیش شروع کردی۔
