مراد سعید ارشد شریف کے گھر چھپے تھے، فیصل واوڈا

اسلام آباد: سینیٹر فیصل واوڈا نے انکشاف کیا ہے کہ مرحوم سینئر صحافی و اینکر پرسن ارشد شریف کے کینیا میں قتل کے بعد مراد سعید ان ہی کے گھر میں چھپے ہوئے تھے، پورے پاکستان کو چیلنج ہے میری بات غلط ثابت کر دے۔

نجی چینل کی اسپیشل ٹرانسمیشن میں گفتگو کرتے ہوئے فیصل واوڈا نے اہم انکشافات کیے۔ ان کا کہنا تھا کہ عمران خان نے مراد سعید کو اپنے بعد لیڈر نامزد کیا تھا، بانی کو کچھ بڑا ہونے کا پتا تھا لیکن یہ نہیں معلوم تھا کہ ارشد شریف کا قتل ہوگا۔

فیصل واوڈا نے دعویٰ کیا کہ عمران خان کو کہہ کر آیا تھا کہ آپ پر حملہ ہونے والا ہے، سابق وزیر اعظم پر حملہ ان کی جان لینے کیلیے ہی ہوا تھا، ان کے ساتھ پارٹی کی سینئر لیڈرشپ موجود ہی نہیں تھی۔انہوں نے کہا کہ ارشد شریف کو دبئی سے جانے پر ارسلان ستی نامی شخص نے دباؤ ڈالا جسے سابق ڈی جی آئی ایس آئی فیض حمید نے اپائنٹ کرایا تھا۔

اسپیشل ٹرانسمیشن میں فیصل واوڈا نے یہ بھی بتایا کہ میرے نزدیک فیض حمید کی گرفتاری کا فیصلہ بہت دیر سے ہوا، جو دوسروں کی کرسیاں لیتا تھا وہ آج اندر چلا گیا ہے۔

انہوں نے کہا کہ فیض حمید کی گرفتاری سے گھٹن کا ماحول ختم ہوا، ٹاپ سٹی انکوائری میں بہت سے لوگوں کے کیرئیر تباہ ہوئے، اس پوری گیم کے اندر کریڈٹ تگڑے جمہوری آدمی چوہدری نثار کا تھا جس نے اسٹینڈ لیا، کھڑے ہوئے اور انکوائری کرائی۔

فیض حمید جھگڑے میں چار کردار ہیں جس میں ایک بانی پی ٹی آئی بھی ہیں۔ متوقع اہم قانون سازی کے بارے میں ان کا کہنا تھا کہ قانون بدلنے کیلیے نمبر پورے ہو جائیں گے، پاکستان کی بہتری کیلیے قانون میں تبدیلی کرنی پڑی تو کریں گے، آئین اور قانون بدلنا پارلیمان کا کام ہے۔

انہوں نے کہا کہ پاکستان کی بہتری کیلیے اسمبلی جو بھی فیصلہ کرے گی قانون سازی اسی کے مطابق ہوگی، سب ہو جائے گا ’ملک اور قوم کا وسیع ترمفاد‘ میری یہ بات ہمیشہ یاد رکھیں۔

فیصل واوڈا سے سوال کیا گیا کہ کیا دو سے تین دن میں کوئی قانون سازی ہونے والی ہے؟ اس سوال پر وہ بولے تو پھر کیا میں اسلام آباد میں کافی پینے آیا ہوں، کیا آپ نے گانا سنا ہے ’مولانا آ رہے ہیں‘، یہ گانا یاد رکھیں اس کو گاڑی میں بجانا شروع کر دیں۔

ان کا کہنا تھا کہ پاکستان کے وسیع تر مفاد اور جمہوریت کی خاطر مولانا فضل الرحمان کا ساتھ ہونا ضروری ہے، آئینی عہدہ بھی خالی ہو سکتا ہے، بہت چیزیں ہو سکتی ہیں، مخصوص نشستوں کے معاملے پر پی ٹی آئی کو مایوسی ہوگی۔