انصاراللہ کے خلاف جنگ میں سعودی تعاون حاصل کرنے کی نیتن یاہو کی کوشش مسترد
اسرائیلی اخبار ہارٹز کے مطابق اسرائیلی وزیراعظم نیتن یاہو نے امریکا کے ذریعے سعودی عرب کو پیشکش کی تھی کہ اسرائیل یمن میں انصاراللہ کے خلاف جنگ میں مدد فراہم کرسکتا ہے۔
اسرائیلی اخبار کے مطابق اس پیشکش کا مقصد سعودی عرب کے ساتھ تعلقات کو مضبوط بنانا تھا، تاہم سعودی عرب ولی عہد محمد بن سلمان نے یمن میں انصاراللہ کے خلاف جنگ میں شامل ہونے کی اسرائیل کی درخواست مسترد کر دی۔
برطانوی میڈیا کے مطابق ٹرمپ اور نیتن یاہو طویل عرصے سے اس امکان کا ذکر کر رہے تھےکہ متحدہ عرب امارات، بحرین اور مراکش کی جانب سے 2020 میں اسرائیل کے ساتھ تعلقات معمول پر لانےکے بعد سعودی عرب بھی اسرائیل کے ساتھ تعلقات معمول پر لے آئے گا تاہم اکتوبر 2023 میں غزہ میں اسرائیلی جارحیت کے آغاز کے بعد بظاہر یہ منصوبے آگے نہ بڑھ سکے اور ان پر عمل درآمد کی امیدیں دم توڑ گئیں۔
خیال رہےکہ سعودی عرب کا سرکاری مؤقف ہےکہ اسرائیل کے ساتھ تعلقات صرف اسی صورت میں معمول پر لائے جا سکتے ہیں جب فلسطینی ریاست کے قیام کی جانب ٹھوس پیش رفت ہو۔