پاکستانی پارلیمنٹ کے اسپیکر نے ایران کے صدر کو مبارکباد دی

پاکستان کی قومی اسمبلی کے اسپیکر نے اسلامی جمہوریہ ایران کے صدر مسعود پزشکیان کی حلف برداری پر مبارکباد پیش کی اور اس بات پر زور دیا کہ ایران کے ساتھ ہمارے تعلقات خصوصی اہمیت کے حامل ہیں اور ہمیں امید ہے کہ نئے دور میں دونوں ممالک کے درمیان برادرانہ تعلقات مزید مستحکم ہوں گے۔

پاکستان کی قومی اسمبلی کے اسپیکر سردار ایاز صادق نے ایک پیغام میں اسلامی جمہوریہ ایران کے صدر کو عہدے کے آغاز پر پاکستان کی قوم اور پارلیمنٹ کی جانب سے مبارکباد پیش کی ہے۔

ایاز صادق نے تاکید کی: اسلامی جمہوریہ ایران اور پاکستان کے درمیان دیرینہ اور برادرانہ تعلقات کی جڑیں تاریخ، ثقافت، تہذیب اور ہمسائیگی میں پیوست ہیں اور پاکستان ایران کے ساتھ اپنے تعلقات کو بہت اہمیت دیتا ہے۔

پاکستان کی قومی اسمبلی کے اسپیکر نے ایران کے نئے صدر کے لیے مزید کامیابی اور عزت کی دعا کی اور کہا کہ ہمیں امید ہے کہ نئے دور میں ہمارے دوطرفہ تعلقات مزید مضبوط ہوں گے۔

پاکستان کے نائب وزیراعظم اور وزیر خارجہ سینیٹر محمد اسحاق ڈار نے منگل کو ایک وفد کی سربراہی میں تہران کا دورہ کیا اور ایران کے صدر کی تقریب حلف برداری میں شرکت کی۔

پاکستان کی وزارت خارجہ نے بھی صدر ایران کی تقریب حلف برداری کے بعد ایک بیان جاری کیا اور کہا: پاکستانی وفد کے سربراہ نے نئی حکومت کو کامیابی کے ساتھ اقتدار کی منتقلی پر ایرانی قوم کو مبارک باد دی اور اسی طرح پاکستان کے عوام اور حکومت کی جانب سے ایران کی نئی حکومت کی حمایت اور یکجہتی نیز دونوں ہمسایہ ملکوں کے درمیان تعلقات میں فروغ کے لئے اسلام آباد کی احساس ذمہ داری کا اعلان کیا۔