غزہ میں جنگبندی برقرار کی جائے، بائیڈن کو میکرون کا مشورہ
فرانسیسی صدارتی دفتر کی جانب سے جاری ہونے والے ایک بیان میں اعلان کیا گیا ہے کہ امریکی صدر جوبائیڈن کے ساتھ گفتگو میں فرانسیسی صدر ایمانوئل میکرون نے غزہ میں جنگبندی کا مشورہ دیا ہے۔ مذکورہ بیان کے مطابق اپنی گفتگو میں ایمانوئل میکرون نے غزہ میں جنگبندی کی ضرورت پر زور دیا اور رفح پر اسرائیلی حملوں کی مخالفت کی۔ فرانسیسی صدارتی دفتر کے مطابق میکرون و بائیڈن نے غزہ میں انسانی امداد کی ترسیل کو یقینی بنانے کی فوری ضرورت پر بھی زور دیا۔ فرانسیسی صدارتی دفتر کا کہنا ہے کہ دونوں صدور نے خطے، بالخصوص لبنان تک تنازعات کے پھیلاؤ کو روکنے کے لیے فریقین کے مشترکہ عزم پر بھی تاکید کی۔
واضح رہے کہ یہ گفتگو ایک ایسے وقت میں سامنے آئی ہے کہ جب غزہ میں جنگبندی کے لئے سلامتی کونسل میں پیش کردہ الجزائر کی تازہ قرارداد کو امریکہ ہی کی جانب سے ویٹو کیا گیا ہے جبکہ سلامتی کونسل کے 13 اراکین نے اس پر اتفاق کیا تھا۔ بعد ازاں امریکہ نے سلامتی کونسل میں ووٹنگ کے لیے ایک دوسرا مسودہ تجویز کیا ہے کہ جس میں غزہ میں "عارضی جنگبندی” کا مطالبہ کیا گیا ہے۔
یاد رہے کہ امریکہ نہ صرف جنگ غزہ کے آغاز سے ہی تمام اسرائیلی جنگی جرائم کا اندھا حامی رہا ہے بلکہ غزہ میں جنگبندی کے لیے اقوام متحدہ کی سلامتی کونسل کی 3 قراردادوں کو بھی ویٹو کر چکا ہے۔
About Author
