افغانستان خارجیوں اور پاکستان میں سے کسی ایک کا انتخاب کرے، شہباز شریف

پاکستان کے وزیراعظم میاں شہباز شریف نے کہا ہے کہ دہشتگردی کے واقعات میں افغان باشندے ملوث ہیں، افغانستان خارجیوں اور پاکستان میں سے کسی ایک کا انتخاب کرے۔ خیبر پختونخوا میں پاک فوج کے 12 جوانوں کی شہادت پر وزیر اعظم شہباز شریف نے کہا کہ دہشتگردوں کیخلاف بھرپور کارروائیاں جاری رہیں گی اور اس میں کسی قسم کا ابہام برداشت نہیں کیا جائے گا۔انہوں نے کہا کہ ملک میں دہشتگردی کرنیوالے دہشتگردوں کے سرغنہ اور سہولت کار افغانستان میں ہیں، جن کی پشت پناہی بھارت کر رہا ہے۔

شہباز شریف نے کہا کہ ملک میں دہشتگردی کی کارروائیوں میں افغان باشندے ملوث ہیں، جو افغانستان سے آ کر پاکستان میں دہشت گردی کر رہے ہیں، غیر قانونی طور پر پاکستان میں مقیم افغان باشندوں کا جلد انخلا انتہائی اہم ہے۔ انہوں نے کہا کہ پاکستانی قوم دہشت گردی کے معاملے پر سیاست اور گمراہ کن بیانیے کو مکمل طور پر مسترد کرتی ہے، جو بھی خارجیوں اور بھارت کی دہشت گرد پراکسیز کی سہولت کاری اور معاملہ فہمی کی بات کرتا ہے وہ انہی کا آلہ کار ہے اور اُسے بھی اُسی زبان میں جواب دیا جائے گا جس کا وہ حق دار ہے۔