مکہ میں پاکستان اور سعودی عرب کے سربراہان کی ملاقات؛

مکہ میں پاکستان اور سعودی عرب کے سربراہان کی ملاقات؛ مسئلہ فلسطین کے منصفانہ حل کی حمایت

🔻 پاکستان کے وزیرِاعظم نے اپنے سرکاری دورۂ سعودی عرب کے دوران، مکہ مکرمہ میں سعودی ولی عہد سے ملاقات کی۔ اس موقع پر انہوں نے جنوبی ایشیا میں پائیدار امن کی ضرورت پر زور دیا اور غزہ کی صورت حال پر تشویش کا اظہار کرتے ہوئے کہا کہ اسلام آباد مسئلہ فلسطین کے منصفانہ حل کی غیر متزلزل حمایت جاری رکھے گا۔

🔻 وزیرِاعظم کے دفتر کی جانب سے جاری کردہ اعلامیے کے مطابق، شہباز شریف نے اپنے اعلیٰ سطحی وفد کے ہمراہ مکہ مکرمہ میں سعودی ولی عہد محمد بن سلمان سے ملاقات کی۔

🔻 دونوں رہنماؤں نے اس بات پر اتفاق کیا کہ وہ اپنے مشترکہ وژن اور عوامی امنگوں کے مطابق دو طرفہ اسٹریٹجک تعاون کو مزید فروغ دیں گے۔

🔻 پاکستان اور سعودی عرب کے سربراہان نے دو طرفہ تعلقات کو گہرا کرنے کے اپنے باہمی عزم پر بھی زور دیا۔ اس سلسلے میں شہباز شریف نے محمد بن سلمان کو پاکستان کے سرکاری دورے کی دعوت دی، جو سعودی ولی عہد نے قبول کر لی۔

🔻 دونوں رہنماؤں نے غزہ میں انسانی بحران کی سنگین صورت حال پر تفصیلی گفتگو کی اور عالمی برادری کی اخلاقی اور قانونی ذمہ داریوں کو پورا کرنے کی ضرورت پر زور دیا۔

🔻 شہباز شریف اور محمد بن سلمان نے مسئلہ فلسطین کے منصفانہ اور پائیدار حل کی حمایت کا اعادہ کیا، جو اقوام متحدہ کی سلامتی کونسل کی متعلقہ قراردادوں کے مطابق ہو۔

🔻 وزیرِاعظم شہباز شریف نے بھارت کی جارحیت کے مقابلے میں پاکستان کی پُرعزم اور ذمہ دارانہ پالیسی پر زور دیتے ہوئے کہا کہ جنوبی ایشیا میں پائیدار امن صرف بات چیت کے ذریعے ہی ممکن ہے۔