دمشق میں اسرائیلی حملہ، پاسداران انقلاب کے دو عہدے دار شہید

ایران کی نیم سرکاری مہر نیوز ایجنسی نے دو قابل اعتبار ذرائع کے حوالے سے اتوار کو بتایا کہ دمشق میں اسرائیلی حملے میں دو سینیئر اہلکاروں کی شہادت ہوئی ہیں۔

مہر نیوز ایجنسی نے ایک نامعلوم مگر باوثوق ذریعے کا حوالہ دیتے ہوئے کہا: ’اسرائیلی حملے میں ایرانی پاسداران انقلاب کے شام میں انٹیلی جنس چیف اور ان کے ڈپٹی اور دو دیگر اراکین کو نشانہ بنایا گیا۔‘

اس سے قبل خبر رساں ادارے اےا یف پی نے رپورٹ کیا کہ جنگ کی نگرانی کرنے والی تنظیم سیریئن آبزرویٹری فار ہیومن رائٹس کا کہنا تھا: ’اسرائیل کے میزائل حملے میں ایک چار منزلہ عمارت کو نشانہ بنایا گیا، جس میں پانچ افراد مارے گئے اور پوری عمارت کو تباہ کر دیا گیا، جہاں ایران سے منسلک رہنما اجلاس کر رہے تھے۔‘

روئٹرز کے مطابق ذرائع نے بتایا کہ حملے کا نشانہ بننے والی کثیر المنزلہ عمارت شام کی حکومت کی مدد کے لیے موجود ایرانی مشیروں کے زیر استعمال تھی، جو مکمل طور پر زمین بوس ہو گئی۔

اسرائیل کی جانب سے یہ حملہ ایک ایسے وقت میں کیا گیا ہے جب رواں ہفتے ہی ایران نے عراق کے نیم خودمختار کردستان کے علاقے اربیل میں اسرائیل کے ’جاسوسی کے ہیڈ کوارٹر‘ پر حملہ کیا تھا۔ اسی طرح شام میں بھی داعش کے ٹھکانوں کو نشانہ بنایا گیا تھا۔