کراچی: عائشہ منزل پر فرنیچرکی دکانوں میں آگ لگ گئی، کروڑوں کا سامان خاکستر
![](https://baseermedia.com/wp-content/uploads/2023/12/2574877-fire-1701870957-578-640x480.jpg)
کراچی: ضلع وسطی کے علاقے عائشہ منزل کے قریب فرنیچر مارکیٹ کی دکانوں میں آگ لگ گئی، آگ میزنائن فلور پر فوم کے گوداموں تک پہنچ گئی۔ فائر بریگیڈ کی گاڑیاں آج بجھانے کی کوشش کررہی ہیں، آگ کی زد میں آکر ایک شخص شدید زخمی ہوگیا۔
ایکسپریس نیوز کے مطابق کراچی کے ضلع وسطی میں عائشہ منزل کے قریب کثیرالمنزلہ عرشی سینٹر کے گراؤنڈ فلور پر واقع فرنیچر کی دکانوں میں آگ لگ گئی جس نے میزنائن فلور پر فوم کے گدوں کے اسٹاک کو بھی لپیٹ میں لے لیا ہے۔
آگ بجھانے کے لیے اسنارکل طلب کرلی گئی ہے، فائر بریگیڈ کی گاڑیاں آج بجھانے کی کوشش کررہی ہیں تاہم جائے حادثہ پر رش کی وجہ سے امدادی کاموں میں رکاوٹ کا سامنا ہے ،جبکہ فائر بریگیڈ حکام کا کہنا ہے کہ فوم کے باعث آگ کی شدت میں اضافہ ہورہا ہے۔
ریسکیو حکام کا کہنا ہے کہ ابتدائی معلومات کے مطابق آگ شارٹ سرکٹ کے باعث لگی۔ آگ لگنے سے متعدد گاڑیوں اور موٹرسائیکلوں کو بھی نقصان پہنچا ہے، جبکہ کچھ رہائشی فلیٹ بھی متاثر ہوئے ہیں۔
فائر بریگیڈ حکام کے مطابق آگ تیسرے درجے کی ہے جسے بجھانے کے لیے 12 فائر ٹینڈر، 2 باؤزر اور 2 اسنارکل موجود ہیں۔
پولیس حکام کا کہنا ہے کہ آگ سے متاثرہ رہائشی عمارت سے لوگوں کونکال لیا گیا ہے۔ ۔
ایس ایس پی سینٹرل فیصل چاچڑ کے مطابق آگ کو پھیلنے سے روکنے کیلیے اقدامات کیے جارہے ہیں ، آگ جس دکان میں لگی ہے اس کے اوپر رہائشی فلیٹ ہیں۔
ذرائع کے مطابق آتش زدگی کے نتیجے میں کروڑوں کا سامان جل کر خاکستر ہوچکا ہے، جبکہ قریبی دکانوں کے مالکان سامان نکال کر محفوظ کرنے کی کوششیں کررہے ہیں۔
ریسکیو حکام کا کہنا ہے کہ آگ سے جھلس کر ایک شخص شدید زخمی ہوگیا ہے جسے چھیپا ایمبولینس کے ذریعے سول برنس وارڈ منتقل کیا جارہا ہے۔
آتش زدگی کےو اقعے کے پیش نظر واٹر کارپوریشن کے نیپا اور سخی حسن ہائیڈرنٹس پر ایمرجنسی نافذ کردی گئی ہے۔
گورنر و نگراں وزیراعلیٰ سندھ کا نوٹس
گورنر سندھ کامران خان ٹیسوری نے عرشی سینٹر میں لگنے والی آگ کا نوٹس لیتے ہوئے کمشنر کراچی سے رپورٹ طلب کرتے ہوئے شہریوں کے باحفاظت انخلا کو یقینی بنانے کی بھی ہدایت کی ہے۔
انہوں نے کہا کہ کہ آگ پر قابو پانے کے لئے ہر ممکن وسائل بروئے کار لائے جائیں۔
وزیراعلیٰ سندھ نے بھی آتش زدگی کے واقعے کا نوٹس لیتے ہوئے آگ پر فوری قابو پانے کے لیے اقدامات کی ہدایت کی ہے، اور کمشنر اور ڈپٹی کمشنر کو جائے وقوعہ پر پہنچ کر معاملے کی مانیٹرنگ کرنے کا حکم دیا ہے۔
نگراں وزیراعلیٰ نے کہا ہے کہ کمشنر اور ڈپٹی کمشنر وقوعہ پر پہنچ کر سارے ریسکیو عمل کی خود مانیٹرنگ کریں اور آگ پر جلد سے جلد قابو پایا جائے تاکہ کوئی بڑا نقصان نہ ہو، لوگوں کو بحفاظت محفوظ مقام تک پہنچایا جائے۔
وزیراعلیٰ نے فائربریگیڈ کی مزید گاڑیوں کو جائے وقوعہ پر پہنچ کر آگ بجھانے کا حکم دیا ہے۔