شامی وفد کے ساتھ عبوری سیاسی عمل کی حمایت کے طریقوں پر تبادلہ خیال ہوا،سعودی وزیر دفاع

سعودی وزیر دفاع شہزادہ خالد بن سلمان نے شام میں نئی سیاسی انتظامیہ کے وزیر خارجہ، غیر ملکی امور کے وزیر اسعد الشیبانی ، وزیر دفاع اور جنرل انٹیلی جنس سروس کے سربراہ سے ملاقات کی۔ذرائع کے مطابق سعودی وزیر دفاع نے اس ملاقات کو نتیجہ خیزقرار دیا ۔انہوں نے ملاقات کے دوران شام کی صورت حال کی حالیہ پیش رفت کے ساتھ ساتھ عبوری سیاسی عمل کی حمایت کے ایسے طریقوں پر تبادلہ خیال کیا جس سے شامی عوام کی امنگوں کو پورا کیا جا سکے اور شام کی سلامتی، استحکام اور علاقائی سالمیت کو یقینی بنایا جا سکے۔

سعودی وزیر دفاع شہزادہ خالد بن سلمان نے کہا کہ شام میں ہمارے بہن، بھائی سالوں کی جنگوں، تباہی اور زندگی کی مشکل صورتحال سے دوچار ہیں۔اب وقت آگیا ہے کہ شام کو استحکام حاصل ہو اور یہ ملک اٹھ کھڑا ہو اور اس کی صلاحیتوں سے استفادہ کیا جائے۔واضح رہے کہ سعودی عرب نے شام کے وزیر خارجہ کو سعودی عرب کے دورے کا باضابطہ دعوت نامہ بھیجا تھا۔