وزیراعظم کی آج روسی صدر سے ملاقات متوقع

وزیرِاعظم شہباز شریف تاجکستان کا دورہ مکمل کرنے کے بعد دوشنبہ سے قازقستان کے دارالحکومت آستانہ روانہ ہوگئے۔

شہباز شریف آستانہ میں شنگھائی تعاون تنظیم کونسل آف ہیڈز آف اسٹیٹ کے اجلاس اور ایس سی او پلس کے سربراہی اجلاس میں شرکت کریں گے۔

وزیرِاعظم اہم علاقائی اور عالمی مسائل پر پاکستان کے نقطہِ نظر پیش اور ایس سی او خطے کے لوگوں کی فلاح و بہبود کے حوالے سے شنگھائی تعاون تنظیم کی اہمیت کو اجاگر کریں گے۔

شہباز شریف سربراہی اجلاس کے موقع پر شریک رہنماؤں سے ملاقاتیں بھی کریں گے اور وزیراعظم کی آج روسی صدرپیوٹن، ازبکستان کے صدر شوکت مرزایوف سے بھی ملاقات متوقع ہے۔

اس کے علاوہ وزیراعظم آج شنگھائی تعاون تنظیم کے رکن ممالک کے سربراہان کے اعزاز میں قازقستان کے صدر کی جانب سے دیئے جانے والے عشائیے میں بھی شرکت کریں گے۔