سندھ کابینہ کی صنعتی علاقوں کی ترقی کیلئے 2.9 ارب روپے کی منظوری
سندھ کابینہ نے صنعتی علاقوں کی ترقی کیلئے 2.9 ارب روپے کی منظوری دی۔ اجلاس کے دوران گفتگو کرتے ہوئے وزیراعلیٰ سندھ سید مراد علی شاہ نے کہا کہ سندھ حکومت صنعتی ترقی کیلئے پُرعزم ہے، کراچی کے تمام صنعتی علاقوں کی سڑکوں اور نکاسی آب کے نظام کی مرمت کی جائے گی۔ انہوں نے کہا کہ سندھ حکومت صوبے کے دیگر انڈسٹریل اسٹیٹس کیلئے الگ پیکیج کا اعلان کرے گی، 23 اضلاع میں عوامی کچہریاں منعقد کی جائیں، جنوری کے دوسرے ہفتے سے دوبارہ عوامی کچہریاں شروع کی جائیں گی۔ وزیراعلیٰ نے تمام محکموں کو عوامی شکایات کا ازالہ کرکے رپورٹ پیش کرنے کی ہدایت کرتے ہوئے شکایات کا ازالہ نہ ہونے پر متعلقہ افسران کے خلاف کارروائی کا حکم دے دیا۔
