بلوچستان حکومت کا قلم چھوڑ ہڑتال پر ملازمین کیخلاف کارروائی کا فیصلہ
صوبائی حکومت نے احتجاج کرنے والے سرکاری ملازمین کے خلاف کارروائی کا فیصلہ کر لیا ہے۔ ملازمین کی تفصیلات بھی طلب کر لی گئی ہیں۔ تفصیلات کے مطابق بلوچستان کے سرکاری ملازمین کی تنظیموں پر مشتمل بلوچستان گرینڈ الائنس کی کال پر آج سے صوبے میں قلم چھوڑ ہڑتال شروع کر دی گئی ہے۔ جس کے تحت صوبے کے دفاتر میں ملازمین نے احتجاجاً کام کو بند رکھا ہے۔ ہڑتال کے ردعمل میں محکمہ ایس اینڈ جی اے ڈی بلوچستان کی جانب سے ایڈیشنل چیف سیکرٹری منصوبہ بندی و ترقیات، ایڈیشنل چیف سیکرٹری محکمہ داخلہ، سینئر ایم بی آر، چیئر مین سی ایم آئی ٹی اور صوبے کے تمام محکموں کے سیکرٹریز اور آئی جی پولیس کو ارسال کے گئے مراسلے میں مجاذ حکام نے سرکاری ملازمین کے گرینڈ الائنس کے احتجاج میں حصہ لینے والے تمام ملازمین کے نام اور عہدے فراہم کرنے کی ہدایت کی گئی ہے۔ مراسلے میں تفصیلات فوری طور پر جمع کروانے کی بھی ہدایت کی گئی ہے۔
