عمران خان اور بشریٰ کو قید تنہا میں رکھا جا رہا ہے، علیمہ خان

بانی پی ٹی آئی عمران خان کی ہمشیرہ علیمہ خان کا کہنا ہے یہ گولیاں چلائیں، ڈنڈے برسائیں، پانی چلائیں ہم اپنے حق کیلئے بیٹھے ہوئے ہیں، عمران خان کی قید تنہائی ہمیں قبول نہیں۔ مذاکرات ایک ڈرامہ ہے جھوٹ ہے، جب بھی عمران خان احتجاج کی کال دیتے ہیں، مذاکرات کی باتیں شروع ہو جاتی ہیں۔ میڈیا سے گفتگو کرتے ہوئے انہوں نے کہا کہ عمران خان نے کہا ہے ان فارم 47 والوں سے کیا بات چیت ہو سکتی، ان کے تو اپنے ہاتھ میں کچھ نہیں، یہ تو ملازمت کر رہے ہیں، اگر فیلڈ مارشل نے مذاکرات کی بات کرنی ہے پہلے یہ بتائے ہمارے بھائی کو بند کیوں کیا ہوا ہے؟

انہوں نے کہا کہ ہم دھرنا دے کر دنیا کو دکھا رہے ہیں، کہ عمران خان اور بشریٰ بی بی کو قید تنہائی میں ڈال کر ان کا آئینی اور قانونی حق چھینا جا رہا ہے، انہیں ذہنی اذیت دی جا رہی ہے، ہم اس لیے یہاں بیٹھ رہے ہم عمران خان کو اکیلا نہیں چھوڑیں گے۔ علیمہ خان نے کہا عمران خان کی قید تنہائی کو ہم کبھی تسلیم نہیں کریں گے، یہ عمران خان سے بے حد خوفزدہ ہیں، ہم اڈیالہ آتے ہیں تو ان کا خوف ساری دنیا دیکھتی ہے۔