سندھ میں رواں ماہ ڈینگی بے قابو، 439 کیسز رپورٹ ہوئے، محکمہ صحت کی تازہ رپورٹ
محکمہ صحت سندھ نے صوبے بھر میں ڈینگی کے مصدقہ کیسز سے متعلق تازہ رپورٹ جاری کر دی ہے جس کے مطابق رواں ماہ صوبے بھر میں ڈینگی کے 439 مصدقہ کیسز رپورٹ ہوئے ہیں جس کے بعد سال 2025ء کے دوران مجموعی کیسز کی تعداد 1083 تک پہنچ گئی ہے۔ وزیر صحت سندھ ڈاکٹر عذرا پیچوہو کا کہنا ہے کہ کراچی ڈویژن سب سے زیادہ متاثرہ ہے جہاں 188 کیسز رپورٹ ہوئے ہیں، حیدرآباد ڈویژن میں 154 کیسز، میرپورخاص ڈویژن میں 83، سکھر ڈویژن میں 10، شہید بینظیرآباد ڈویژن میں 3 جبکہ لاڑکانہ ڈویژن میں 1 کیس رپورٹ ہوا ہے۔
وزیر صحت سندھ ڈاکٹر عذرا پیچوہو کا کہنا ہے کہ محکمہ صحت کے پاس ڈینگی کے تمام مصدقہ کیسز کا ریکارڈ موجود ہے، اگر کوئی شہری کسی نجی لیبارٹری سے ٹیسٹ کرواتا ہے تو اس کی رپورٹ محکمہ صحت کے ریکارڈ میں شامل نہیں ہوتی، محکمہ صحت کی جانب سے جاری کردہ اعداد و شمار ہی مصدقہ اور مستند ہیں لہذا عوام سے اپیل ہے کہ کسی بھی غیر مصدقہ خبر یا سوشل میڈیا پر گردش کرنے والی اطلاعات پر یقین نہ کریں، تمام مریض جو اسپتالوں میں داخل ہوتے ہیں یا او پی ڈی کے ذریعے آتے ہیں ان کا مکمل ڈیٹا محکمہ صحت کے پاس موجود ہے۔
وزیر صحت ڈاکٹر عذرا پیچوہو نے مزید کہا کہ سندھ حکومت نے صوبے بھر میں انسدادِ ڈینگی مہم پر سنجیدگی سے کام کررہی ہے، تمام اضلاع میں اسپرے، فاگنگ اور نکاسی آب کے نظام کو بہتر بنانے کے احکامات جاری کیے گئے ہیں، ڈپٹی کمشنرز اور ضلعی صحت سے وابستہ افسران کو ہدایت دی گئی ہے کہ کسی بھی علاقے میں پانی جمع نہ ہونے دیا جائے کیونکہ یہی مچھر کی افزائش کا بنیادی سبب بنتا ہے، حکومت شہری و دیہی دونوں علاقوں میں یکساں توجہ دے رہی ہے، تمام سرکاری اسپتالوں میں ڈینگی کے مریضوں کے لیے علیحدہ یونٹس قائم کیے گئے ہیں جہاں مفت علاج اور ٹیسٹنگ کی سہولت فراہم کی جا رہی ہے۔
