بھاگ ناڑی، پولیس اسٹیشن پر نامعلوم افراد کا حملہ، ایس ایچ او جانبحق، دو اہلکار زخمی
بلوچستان کے ضلع کچھی کی تحصیل بھاگ ناڑی میں نامعلوم مسلح افراد نے پولیس تھانے پر حملہ کیا۔ جس کے نتیجے میں ایس ایچ او لطف علی کھوسہ جانبحق جبکہ دو پولیس اہلکار زخمی ہوگئے۔ پولیس حکام کے مطابق حملہ آوروں نے بھاگ پولیس اسٹیشن پر دستی بم پھینکے اور فائرنگ کی۔ فائرنگ کے تبادلے کے دوران ایس ایچ او بھاگ ناڑی انسپکٹر لطف علی کھوسہ جانبحق ہو گئے۔ پولیس کی جوابی کارروائی میں ایک حملہ آور مارا گیا، جبکہ دیگر فرار ہونے میں کامیاب ہوگئے۔ فائرنگ کا سلسلہ کچھ دیر تک جاری رہا، جس سے علاقے میں خوف و ہراس پھیل گیا۔ زخمی اہلکاروں کو فوری طور پر قریبی اسپتال منتقل کیا گیا، جہاں ڈاکٹروں کے مطابق ان کی حالت خطرے سے باہر ہے۔ واقعے کے بعد پولیس اور قانون نافذ کرنے والے اداروں نے علاقے کو گھیرے میں لے کر سرچ آپریشن شروع کردیا تاکہ ملوث عناصر کو گرفتار کیا جا سکے۔ حکام کے مطابق حملے کی تحقیقات کا آغاز کر دیا گیا ہے تاکہ واقعے کے محرکات اور حملہ آوروں کے پسِ منظر کا پتہ لگایا جا سکے۔
