ایرانی قونصل جنرل کی لاہور چیمبر آمد، تجارتی حجم میں اضافے پر گفتگو

ایرانی قونصل جنرل مہران مواحد فر نے لاہور چیمبر آف کامرس اینڈ انڈسٹریز کے دورے کے موقع پر سینیئر عہدیداران سے تصیلی ملاقات کی۔ ملاقات میں صدر چیمبر فہیم الرحمان سہگل، سینئر نائب صدر تنویر احمد شیخ، نائب صدر خرم لودھی سمیت دیگر بھی موجود تھے۔ صدر لاہور چیمبر نے کہا کہ دونوں ممالک کے درمیان دہائیوں پرانے تعلقات ہیں، ایران کیساتھ ہر شعبے میں تعاون بڑھانے کے خواہاں ہیں۔ صدر لاہور چیمبر فہیم الرحمان سہگل  نے کہا کہ لاہور چیمبر ایران کو اہم تجارتی شرکت دار سمجھتا ہے، ایران کیساتھ تجارتی حجم جو ہونا چاہیئے وہ نہیں ہے، اس کو مزید وسعت دیں گے۔

ایرانی قونصل جنرل نے کہا پاکستان کے ساتھ ہماری مذہبی، ثقافتی اور تجارت سمیت ہر شعبے میں مضبوط تعلقات ہیں۔ پاک ایران گیس پائپ لائن سمیت ہر منصوبے اور شعبے میں وسعت لانے کی ضرورت ہے۔ انہوں نے کہا کہ ایران نے ہمیشہ پاکستان کو ترجیح دی ہے اور چاہتے ہیں کہ دونوں ممالک کے درمیان ادائیگیوں کا بھی کوئی میکانزم بنے، تاکہ دونوں جانب سے کاروباری حضرات بہتر انداز میں تجارت کر سکیں۔ انہوں نے کہا کہ ایران پاکستانی تاجروں کو تمام ممکنہ سہولتیں فراہم کر رہا ہے اور اس میں مزید وسعت بھی لا رہے ہیں۔