ہم غزہ میں جنگ بندی کے بہت قریب پہنچ چکے ہیں، شہباز شریف

وزیراعظم محمد شہباز شریف نے سماجی رابطے کی ویب سائٹ ایکس پر جاری اپنے پیغام میں کہا ہے کہ جب سے فلسطینی عوام کی نسل کشی شروع کی گئی ہے، آج ہم جنگ بندی کے سب سے زیادہ قریب ہیں۔ انہوں نے کہا کہ پاکستان ہمیشہ سے فلسطینی عوام کیساتھ کھڑا رہا ہے اور آئندہ بھی ان کا ساتھ دیتا رہے گا۔ وزیراعظم نے صدر ڈونلڈ ٹرمپ سمیت قطر، سعودی عرب، متحدہ عرب امارات، ترکیہ، اردن، مصر اور انڈونیشیا کی قیادت کا شکریہ ادا کیا، جنہوں نے مسئلہ فلسطین کے حل کیلئے اقوام متحدہ کی جنرل اسمبلی کے 80ویں اجلاس کے موقع پر صدر ٹرمپ سے ملاقات کی۔ اپنے پیغام میں شہباز شریف نے کہا کہ حماس کی جانب سے جاری کردہ بیان جنگ بندی کیلئے اُمید کی کرن ہے اور امن قائم کرنے کیلئے ایک ایسا راستہ فراہم کرتا ہے جسے دوبارہ بند نہیں ہونا چاہیے۔وزیر اعظم نے اس عزم کا اظہار کیا کہ ان شاء اللہ پاکستان اپنے تمام دوست اور برادر ممالک کیساتھ مل کر فلسطین میں مستقل امن کے قیام کیلئے کوششیں جاری رکھے گا۔