مودی حکومت جواب دے کہ پہلگام حملہ کے بعد بھی "بھارت پاکستان میچ” کیوں ہوا، کانگریس

ایشیاء کپ میں "بھارت پاکستان کرکٹ میچ” کو لے کر مخالفت نے زور پکڑ لیا ہے۔ کانگریس لیڈر ادت راج نے میچ کی مخالفت کرتے ہوئے مودی حکومت سے کئی تلخ سوال پوچھے ہیں۔ انہوں نے کہا کہ "ہندوستان-پاکستان میچ کی مخالفت ہر جگہ ہو رہی ہے اور شہید شبھم کے اہل خانہ نے بھی حکومت سے سوال پوچھا ہے کہ دہشت گردانہ حملے کے بعد بھی پاکستان کے ساتھ کرکٹ میچ کیوں کھیلا جا رہا ہے”۔ کانگریس لیڈر ادت راج نے کہا کہ ہندوستان-پاکستان میچ کو لے کر پورے ملک میں احتجاج دیکھا جا رہا ہے، حالانکہ یہ معاملہ مرکزی وزیر داخلہ کے بیٹے سے متعلق ہے اور جو حکومت چاہے گی وہی ہوگا۔ ساتھ ہی انہوں نے کہا کہ شہید شبھم کی اہلیہ نے پوچھا ہے کہ 26 لوگوں کو شہید کر دیا گیا اور جن کی وجہ سے ان کی جانیں گئیں، اب اسی ملک کے ساتھ کرکٹ کھیلا جا رہا ہے۔

ادت راج نے مودی حکومت اور بی سی سی آئی سے سوال کیا کہ کیا بی سی سی آئی ملک کے عوامی جذبات سے بالاتر ہے، اگر یہی کام اپوزیشن کی حکومت نے کیا ہوتا تو پورے ملک میں تحریک چلتی اور "ہندو-مسلم” کرنے کی کوشش کی جاتی۔ انہوں نے کہا کہ پہلگام دہشت گردانہ حملہ میں جن 26 لوگوں کو قتل کیا گیا، ان کے اہل خانہ کیا سوچ رہے ہوں گے۔ ساتھ ہی انہوں نے کہا کہ سب سے اہم بات یہ ہے کہ آپریشن سندور جاری ہے، جو یہ ظاہر کرتا ہے کہ پاکستان کے ساتھ ہمارے تعلقات اب تک استوار نہیں ہوئے ہیں۔ یہ کمال کی بات ہے کہ خون بھی بہہ رہا ہے اور کرکٹ بھی ہو رہا ہے، میں اس قدم کو آمرانہ رویہ تصور کرتا ہوں۔