باجوڑ امداد لے جانیوالا کے پی حکومت کا ہیلی کاپٹر گرکر تباہ، 5 افراد شہید
کے پی حکومت کا ہیلی کاپٹر امدادی سامان باجوڑ لے جاتے ہوئے مہمند میں گر کر تباہ ہوگیا جس میں دو پائلٹ سمیت پانچ افراد شہید ہوگئے۔ تفصیلات کے مطابق خیبر پختونخوا حکومت کا ہیلی کاپٹر پشاور سے باجوڑ جاتے ہوئے لاپتا ہوا اور ضلع مہمند پہنچ کر اس کا رابطہ منقطع ہوا۔ چیف سیکریٹری کے پی نے اس حوالے سے بتایا ہے کہ ہیلی کاپٹر پشاور سے باجوڑ جارہا تھا کہ ضلع مہمند میں اس کا رابطہ منقطع ہوگیا، خراب موسم کے سبب ہیلی کاپٹر تباہ ہوا۔ اعلیٰ حکام کے مطابق ہیلی کاپٹر چینگی بانڈہ میں گرا ہے جس میں تین افراد شہید ہوئے۔ دوسری جانب ذرائع کا کہنا ہے کہ مہمند کے آس پاس کے علاقوں میں دھماکے کی آواز بھی سنی گئی ہے، مقامی افراد کا کہنا ہے کہ ہیلی کاپٹر گرا ہے جس کی وجہ سے دھماکا ہوا اس تک پہنچنے کا راستہ بہت دشوار ہے۔
وزیراعلیٰ علی امین گنڈاپور نے کہا ہے کہ MI-17 ہیلی کاپٹر باجوڑ کے بارشوں سے متاثرہ علاقہ سالارزئی میں امدادی سامان لے کر جارہا تھا، خراب موسم کی وجہ سے ضلع مہمند کے فضائی حدود میں ہیلی کاپٹر سے رابطہ منقطع ہوا، ہیلی کاپٹر سے رابطہ قائم کرنے کے لئے تمام تر کوششیں کی گئیں، علاقے میں فوری طور پر ٹیمیں بھیجنے کی ہدایات کردی ہے جب کہ دوسرا ہیلی کاپٹر بونیر میں ریسکیو کارروائیوں میں مصروف ہے۔
