پاکستان کا دفاع ناقابل تسخیر، کوئی میلی آنکھ سے نہیں دیکھ سکتا، محسن نقوی

n01226853-b.jpg

وفاقی وزیر داخلہ محسن نقوی نے کہا ہے کہ 2025 کا پاکستان دفاع کی مکمل صلاحیت رکھتا ہے اور کوئی دشمن میلی آنکھ سے اس کی طرف نہیں دیکھ سکتا، پاکستان کے 78ویں یوم آزادی کے موقع پر وفاقی وزیر داخلہ محسن نقوی نے قوم کو دل کی گہرائیوں سے مبارکباد پیش کرتے ہوئے کہا ہے کہ یہ دن قربانیوں، جدوجہد اور آزادی کے خوابوں کی تعبیر کا دن ہے، پاکستان اللہ تعالیٰ کی بہت بڑی نعمت ہے جس کی قدر کرنا ہر پاکستانی پر فرض ہے۔ محسن نقوی نے بانی پاکستان قائداعظم محمد علی جناح کا حوالہ دیتے ہوئے کہا ہے کہ پاکستان کا قیام مقدر تھا، یہ کسی کی بخشش نہیں بلکہ ہماری جدوجہد کا صلہ ہے، پاکستان کی آزادی کیلئے خون، آنسو اور شہادتیں دی گئیں اور آج کا پاکستان انہی قربانیوں کی بنیاد پر قائم ہے۔

وزیر داخلہ نے وطن کے دفاع و امن کیلئے جانیں قربان کرنیوالے شہداء کو خراج تحسین پیش کرتے ہوئے کہا ہے کہ یہ شہداء ہمارے ماتھے کا جھومر ہیں، ان کی قربانیاں قوم کبھی نہیں بھولے گی، شہدائے وطن کے خاندان ہمارے اپنے خاندان ہیں اور ان کے عزم اور حوصلے کو سلام پیش کرتا ہوں۔ انہوں نے مزید کہا ہے کہ پاکستان نے دشمن کو معرکۂ حق میں عبرتناک شکست دے کر ثابت کیا ہے کہ ایمان، اتحاد، تنظیم آج بھی ہماری طاقت، پہچان اور بقا کی سب سے بڑی ضمانت ہیں، 2025 کا پاکستان دفاع کی مکمل صلاحیت رکھتا ہے اور کوئی دشمن میلی آنکھ سے اس کی طرف نہیں دیکھ سکتا۔ محسن نقوی نے یوم آزادی کے موقع پر اس عزم کا اعادہ کیا کہ قوم نئے جذبے اور نئی سوچ کیساتھ آگے بڑھے گی اور ہر چیلنج کا ڈٹ کر مقابلہ کرے گی، پاکستان کا دفاع ناقابل تسخیر ہے اور ان شاءاللہ ملک ترقی و خوشحالی کی نئی منزلیں طے کرے گا۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے