قابض حکام نے مقبوضہ کشمیر میں مزید تین کشمیریوں کی جائیدادیں ضبط کر لیں

غیر قانونی طور پر بھارت کے زیر قبضہ جموں و کشمیر میں قابض حکام نے ضلع بڈگام میں غیر قانونی سرگرمیوں کی روک تھام کے کالے قانون کے تحت مزید تین کشمیریوں کی جائیدادیں ضبط کر لیں۔ ذرائع کے مطابق نئی دہلی کے مسلط کردہ لیفٹیننٹ گورنر منوج سنہا کی زیر قیادت قابض انتظامیہ نے جو جائیدادیں ضبط کی ہیں ان میں ضلع کے علاقوں ہروانی، چیوہ اور کھاگ سے تعلق رکھنے والے منظور احمد چوپان کا دو منزلہ رہائشی مکان، محمد یوسف ملک کا دو منزلہ مکان اور 05 کنال 13مرلہ اراضی اور بلال احمد وانی کی 19.5مرلہ زرعی اراضی شامل ہے۔ بی جے پی حکومت نے اگست 2019ء میں مقبوضہ جموں و کشمیر کی خصوصی حیثیت کی غیر قانونی منسوخی کے بعد سے کشمیریوں کو ان کے گھروں اور زمینوں سے بے دخل کرنے کی مہم تیز کر دی ہے۔ اس پالیسی کا مقصد کشمیری عوام کو معاشی طور پر کمزور کرنا اور علاقے میں آبادی کا تناسب تبدیل کرنا ہے۔