یمن کی سعودی عرب کو وارننگ

یمن کی انصاراللہ حکومت نے سعودی عرب اور متحدہ عرب امارات کو فوجی مداخلت پر سخت انتباہ جاری کردیا۔

صنعاء: یمن کی انصاراللہ تحریک کے رہنما حزام الاسد نے سعودی عرب اور متحدہ عرب امارات کو کسی بھی فوجی مداخلت کے سنگین نتائج سے آگاہ کر دیا ہے۔ سماجی میڈیا پر جاری ایک بیان میں الاسد نے واضح کیا کہ "اگر ریاض اور ابوظبی نے امریکہ کی حمایت میں یمن کے خلاف فوجی کارروائی کی تو وہ اپنے زیر قبضہ یمنی علاقوں میں باقی ماندہ اثر رسوخ بھی کھو دیں گے”۔ انہوں نے متنبہ کیا کہ "اس بار یہ ممالک آگ سے کھیلنے کے نتیجے میں ناقابل تلافی نقصان اٹھائیں گے”۔

اس انتباہ کا پس منظر یہ ہے کہ گزشتہ ہفتوں میں یمنی افواج نے غزہ کی حمایت میں بحیرہ احمر میں اسرائیلی جہازوں کو نشانہ بنایا تھا، جس کے بعد امریکہ نے یمن کے خلاف فوجی کارروائیاں تیز کر دی تھیں۔ ماہرین کے مطابق، انصاراللہ کا یہ بیان سعودی عرب اور متحدہ عرب امارات کو یمن میں فوجی مداخلت سے روکنے کی کوشش ہے۔