عالمی ایٹمی توانائی ایجنسی کے سربراہ رافیل مریانو 2 روزہ دورے پر پاکستان پہنچ گئے
عالمی ایٹمی توانائی ایجنسی ( آئی اے ای اے) کے ڈائریکٹر جنرل رافیل مریانو گروسی پاکستان پہنچ گئے۔ترجمان دفتر خارجہ کے مطابق عالمی ایٹمی توانائی ایجنسی کے ڈائریکٹر جنرل رافیل مریانو گروسی 2 روزہ سرکاری دورے پر پاکستان پہنچے ہیں۔ترجمان کا کہناتھا کہ پاکستان اور آئی اے ای اے کے درمیان طویل تعاون کی ایک تاریخ ہے، ڈی جی آئی اے ای اے کا دورہ جوہری ٹیکنالوجی کے پُرامن استعمال پر پاکستان اور آئی اے ای اے کی شراکت داری کو مزید گہرا کرتا ہے۔
دفتر خارجہ کے مطابق دورے کے دوران رافیل مریانو اہم سیاسی رہنماؤں سے ملاقاتیں، سیمینارز میں شرکت اور جوہری توانائی پیدا کرنے والی سائٹ کا دورہ کریں گے۔اپنے دورے کے دوران وہ وزیر اعظم شہباز شریف اور نائب وزیر اعظم اور وزیر خارجہ اسحٰق ڈار سے بھی ملاقات کریں گے۔واضح رہے کہ آئی اے ای اے اقوام متحدہ کا ایٹمی نگران ادارہ ہے، جو ایٹمی ٹیکنالوجی کے محفوظ اور پرامن استعمال کو فروغ دینے کی عالمی کوششوں کی نگرانی کرتا ہے۔ پاکستان 1957 سے ایجنسی کے ساتھ تعاون کر رہا ہے اور اس کے تحفظات کے تحت ایک فعال سول نیوکلیئر پاور پروگرام کو برقرار رکھے ہوئے ہے۔
