امریکی حادثے میں تباہ ہونے والا بلیک ہاک ہیلی کاپٹر ماضی میں کب کب حادثات کا شکار ہوا؟
امریکی دارالحکومت واشنگٹن میں ریگن انٹرنینشل ایئرپورٹ کے قریب ایک مسافر طیارہ اور فوجی ہیلی کاپٹر دوران پرواز تصادم کے بعد قریبی دریا میں جاگرے جس کے نتیجے میں متعدد ہلاکتوں کا خدشہ ظاہر کیا جارہا ہے۔میڈیا رپورٹس کے مطابق، بدھ کی رات پیش آنے والے اس حادثے کے بعد ریسکیو ٹیموں نے ’دریائے پوٹومیک‘ سے اب تک 20 لاشیں اور 4 زخمیوں کو نکال لیا ہے اور دیگر کی تلاش جاری ہے۔امریکی میڈیا کے مطابق، مسافر طیارے سے جو فوجی ہیلی کاپٹر ٹکرایا وہ امریکی آرمی کا مشہور ’بلیک ہاک‘ ہیلی کاپٹر تھا جسے دنیا کا جدید ترین ہیلی کاپٹر تصور کیا جاتا ہے، تاہم یہ ہیلی کاپٹر بھی متعدد فضائی حادثوں کا شکار ہوا ہے۔
1981 سے 1984 کے درمیان بلیک ہاک ہیلی کاپٹرز کے دوران پرواز 16 حادثات ہوئے جس کے باعث 22 اموات ہوئیں۔ 1985 میں صرف 4 ماہ کے عرصے میں یہ ہیلی کاپٹر لگاتار 6 بار فضائی حادثوں کا شکار ہوا جن میں 15 اموات ہوئیں۔ ان واقعات کے بعد امریکی آرمی نے عارضی طور پر اس ہیلی کاپٹر کو گراؤنڈ کردیا تھا۔مارچ 2023 تک کے اعداد وشمار کے مطابق، بلیک ہاک ہیلی کاپٹر 390 حادثوں کا شکار ہوا، جن میں مجموعی طور پر 970 اموات ہوئیں۔ صرف 2019 سے 2023 کے دوران امریکی سرزمین پر بلیک ہاک ہیلی کاپٹر کے کریش ہونے کے 10 واقعات پیش آئے جن میں متعدد امریکی فوجی ہلاک ہوئے۔
