بھارت: دلت طالبہ کا ’5 سال میں 64 آدمیوں نے ریپ کیا‘، 27 ملزمان گرفتار
بھارت کی جنوبی ریاست کیرالہ سے تعلق رکھنے والی 18 سالہ دلت خاتون نے 64 مردوں پر ریپ کا الزام عائد کیا اور دعویٰ ہے کہ یہ افراد اسے گزشتہ 5 برس کے دوران جنسی ہراسانی کا نشانہ بناتے رہے۔بھارتی میڈیا کی رپورٹ کے مطابق پولیس نے بتایا کہ کیس کے سلسلے میں 23 افراد کو گرفتار کیا گیا اور 4 نابالغوں کو حراست میں لیا گیا۔بیان میں مزید کہا گیا کہ 18 سالہ لڑکی کی جانب سے رپورٹ کیے گئے واقعے کے سلسلے میں، مجموعی طور پر 27 ملزمان کو دو تھانوں نے مشترکہ طور پر گرفتار کیا تھا۔
پولیس کے مطابق اس کے علاوہ ایک ضلع نے 14 افراد کو 14 روزہ عدالتی تحویل میں بھیج دیا، انہوں نے کہا کہ اس معاملے میں کئی دیگر کو پولیس کی تحویل میں لیا گیا ہے، ایک اور اہلکار کے مطابق تفتیش جاری ہے اور مزید گرفتاریاں کی جائیں گی۔ضلعی حکام کے مطابق 2 الگ تھانوں میں کیس کے سلسلے میں مزید 10 فرسٹ انفارمیشن رپورٹس (ایف آئی آرز) درج کی گئیں، مقدمات لڑکی کے بیانات کی بنیاد پر مقدمات درج کیے گئے ہیں۔2 روز قبل مقدمہ درج کرانے والے عہدیدار نے کہا تھا کہ معاملے کی نوعیت سنگین ہے، لڑکی کے ساتھ اس وقت سے بدسلوکی کی گئی جب وہ 8ویں کلاس میں تھی اور عوامی مقامات پر بھی اس کے ساتھ مبینہ طور پر بدسلوکی کی گئی۔
گزشتہ دنوں ایک دلت لڑکی نے دعویٰ کیا تھا کہ بھارتی ریاست کیرالہ میں گزشتہ 5 برسوں کے دوران 64 افراد نے اسے جنسی زیادتی کا نشانہ بنایا۔بھارتی میڈیا کی رپورٹ کے مطابق ایک کونسلنگ سیشن کے دوران لڑکی کے انکشاف پر چائلڈ ویلفیئر کمیٹی (سی ڈبلیو سی) کی شکایت کے بعد پولیس نے مقدمات درج کرلیے گئے۔یہ معاملہ اس وقت سامنے آیا تھا، جب ایک این جی او اپنے معمول کے فیلڈ وزٹ کے طور پر لڑکی کے گھر پہنچی، لڑکی کی جانب سے 5 برسوں کے دوران ہونے والی خوفناک صورتحال بیان کیے جانے کے بعد این جی او نے چائلڈ ویلفیئر کمیٹی کو اس کی اطلاع دی۔
اپنے کونسلنگ سیشن کے دوران لڑکی نے دعویٰ کیا تھا کہ جنسی زیادتی اس وقت شروع ہوئی جب وہ صرف 13 سال کی تھی اور اس کے پڑوسی نے اس کے ساتھ فحش مواد شیئر کیا، وہ اب 18 سال کی ہے۔اپنے اسکول میں کھیلوں میں سرگرم رہنے والی لڑکی نے تربیتی سیشن کے دوران بھی جنسی زیادتی کے واقعات کا انکشاف کیا، اس نے یہ بھی انکشاف کیا تھا کہ اس کی کچھ ویڈیوز زیر گردش ہیں ۔پولیس نے بتایا کہ اب تک 10 سے زائد افراد کو حراست میں لے لیا گیا ہے، پولیس کا کہنا ہے کہ لڑکی کا تفصیلی بیان ریکارڈ کیا جائے گا۔
