غزہ پر صیہونی جارحیت شہیدوں کی تعداد 40 ہزار 99

غزہ پٹی کی وزارت صحت نے اس علاقے میں صیہونی حکومت کے جرائم کے 317 دنوں میں 40 ہزار سے زائد فلسطینی شہریوں کی شہادت کا اعلان کیا ہے۔

بیان میں کہا گيا ہے کہ 7 اکتوبر سے اب تک صیہونی فوج کے حملوں میں شہیدوں کی تعداد 40 ہزار 99 ہو گئی ہے۔

غزہ پٹی میں فلسطینی وزارت صحت کے بیان میں کہا گیا ہے: صیہونی فوج نے گزشتہ 24 گھنٹوں میں غزہ پٹی میں 2 جرائم کا ارتکاب کیا جس کے نتیجے میں 25 فلسطینی شہید اور 72 زخمی ہوئے۔

اس بیان میں کہا گیا ہے: ان شہداء اور زخمیوں سمیت، 7 اکتوبر 2023 کو غزہ پٹی پر صیہونی حکومت کے حملوں کے آغاز سے اب تک 40099 فلسطینی شہید اور 92,609 فلسطینی زخمی ہوئے ہیں۔

در ایں اثنا غزہ پٹی میں موبائل اسپتال کے انچارج مروان الھمص نے اتوار کو بتایا ہے کہ اس علاقے کے تمام اسپتالوں میں کام بند ہونے والا ہے کیونکہ صیہونی فوج کے حملوں سے اسپتال تباہ ہو رہے ہيں۔

انہوں نے کہا: 10 برس سے کم عمر کے 5 لاکھ بچوں کو ویکسین کی ضرورت ہے اور خدشہ ہےکہ 2 لاکھ بچوں کو پولیو ہو جائے ۔

غزہ پٹی میں فلسطینی وزارت صحت نے بتایا ہے کہ مسلسل حملوں کے باعث متعدد شہداء کی لاشیں اب بھی ملبے تلے دبی ہوئی ہیں اور امدادی تنظیمیں انہیں تلاش کرنے میں ناکام ہیں۔

واضح رہے فلسطینی مجاہدوں نے 7 اکتوبر سن 2023 میں الاقصی طوفان نام سے غزہ سے ایک آپریشن شروع کیا تھا۔

45 دنوں تک جنگ جاری رہنے کے بعد 24 نومبر کو اسرائیل اور حماس کے درمیان جنگ بندی ہوئي جس کے دوران قیدیوں کا تبادلہ ہوا۔

7 دنوں تک جاری رہنے کے بعد عبوری جنگ بندی ہو گئي اور پہلی دسمبر2023 سے صیہونی حکومت نے غزہ پر پھر سے حملے شروع کر دیئے جو اب تک جاری ہیں اور بڑے پیمانے پر عام شہری شہید ہو رہے ہيں۔