راولپنڈی ڈویژن کے ڈسٹرکٹ ریٹرنگ افسران کی مشترکہ پریس کانفرنس، سابق کمشنر لیاقت چٹھہ کے الزامات کی تردید
سابق کمشنر راولپنڈی لیاقت چٹھہ کے انتخابات میں مبینہ دھاندلی سے متعلق الزامات کے بعد ضلع راولپنڈی کے پانچ ڈسٹرکٹ ریٹرنگ افسران نے مشترکہ پریس کانفرنس میں اس نوعیت کے دعوؤں کی تردید کی ہے۔
ڈی آر اوز کی پریس کانفرنس کے موقع پر گذشتہ روز ہی راولپنڈی میں کمشنر کے عہدے کا چارج سنبھالنے والے سیف انور بھی موجود تھے۔ یاد رہے کہ کمشنر کی جانب سے راولپنڈی ڈویژن میں انتخابی دھاندلی سے متعلق الزامات کے بعد نگراں حکومت نے انھیں اُن کے عہدے سے ہٹا دیا تھا اور اس عہدے کا اضافی چارج ڈائریکٹر جنرل راولپنڈی ڈویلپمنٹ اتھارٹی سیف ایوان کو دے دیا تھا۔
پریس کانفرنس سے خطاب کرتے ہوئے ڈسٹرکٹ ریٹرنگ افسران نے الیکشن کمیشن سے اِن الزامات کی آزادانہ تحقیقات کا مطالبہ کیا ہے۔ یاد رہے کہ سنیچر کو رات گئے الیکشن کمیشن میں چیف الیکشن کمشنر کی سربراہی میں ہونے والے اجلاس میں ان الزامات کی تحقیقات کے لیے ایک اعلیٰ سطح کی کمیٹی قائم کر دی گئی ہے جو اس معاملے پر تین دن میں اپنی رپورٹ پیش کرے گی۔
پریس کانفرنس میں ڈی آر اوز نے دعویٰ کیا کہ اُن پر پولنگ کے روز کوئی دباؤ نہیں تھا اور انھوں نے قوانین کے تحت الیکشن کا انعقاد کروایا
ڈی آر او جہلم کیپٹن ریٹائرڈ سمیع اللہ فاروق نے دعویٰ کیا کہ انتخابات صاف و شفاف تھے جبکہ یہی مؤقف ڈی آر او چکوال قراۃ العین نے بھی اختیار کیا۔
اس پریس کانفرنس میں ڈی آر او راولپنڈی حسن وقار چیمہ، ڈی آر او اٹک راؤ عاطف، ڈی آر او چکوال قراۃ العین، ڈی آر او مری ظہیر عباس شیرازی اور ڈی آر او تلہ گنگ خاور بشیر بھی موجود تھے۔
About Author
