لاہور میں انتخابی ضابطہ اخلاق کی ’خلاف ورزی‘: مسلم لیگ ن، پیپلز پارٹی کے امیدواروں کو نوٹسز جاری

الیکشن کمیشن نے صوبہ پنجاب کے شہر لاہور میں ضابطہ اخلاق کی خلاف ورزی پر کارروائی کرتے ہوئے این اے 127 میں مسلم لیگ ن کے امیدوار عطا اللہ تارڑ اور پی پی 160 میں پیپلز پارٹی کے امیدوار مصباح الرحمن کو نوٹسز جاری کرتے ہوئے پانچ فروری کو طلب کیا ہے۔
دفتر صوبائی الیکشن کمشنر پنجاب نے ایک پیغام میں کہا ہے کہ ’الیکشن کمیشن اور صوبائی الیکشن کمشنر پنجاب کے احکامات پر لاہور میں ضابطہ اخلاق کی خلاف ورزی پر کارروائی۔ ن لیگی امیدوار این اے 127 لاہور عطا تارڑ اور پیپلز پارٹی امیدوار پی پی 160 میاں مصباح الرحمن کو نوٹسز جاری۔
’لاہور میں ن لیگ اور پیپلز پارٹی کے مابین مبینہ ووٹوں کی خرید و فروخت اور الیکشن دفتر پر حملے کے تناظر میں نوٹسز جاری کیے گئے۔ ڈسٹرکٹ مانیٹرنگ آفیسر نے دونوں امیدواران کو 5 فروری کو دستاویزی ثبوتوں کے ساتھ طلب کر لیا۔‘
ترجمان صوبائی الیکشن کمشنر پنجاب نے ایک دوسرے پیغام میں کہا کہ ’الیکشن کمیشن نے این اے 127 لاہور واقعے کا نوٹس لیتے ہوئے صوبائی حکومت پنجاب سے رپورٹ طلب کی تھی۔ الیکشن کمیشن نے صوبائی حکومت کی طرف سے رپورٹ جمع کروانے میں تاخیر پر تشویش کا اظہار کیا۔
’صوبائی حکومت پنجاب کی طرف سے رپورٹ ابھی تک موصول نہیں ہوئی۔ صوبائی الیکشن کمشنر پنجاب اس سلسلے میں ڈپٹی کمشنر لاہور کو فوری ایکشن لینے اور رپورٹ جمع کرانے کی ہدایات جاری۔‘
پیپلز پارٹی اور مسلم لیگ ن کے اِن امیدواروں کی جانب سے ایک دوسرے پر ووٹوں کی خرید و فروخت کے الزامات عائد کیے گئے ہیں۔ بی بی سی ان دعوؤں سے متعلق گردش کرنے والی ویڈیوز کی تصدیق نہیں کر سکا ہے۔