اسرائیل کی غزہ میں مصر کی سرحد پر قبضے کیلئے آپریشن کی تیاریاں
![](https://baseermedia.com/wp-content/uploads/2024/01/1309752_3885436_5_akhbar.jpg)
دو دہائیاں قبل غزہ پٹی سے انخلاء کے بعد سے اسرائیل سوائے ایک کے فلسطین کی تمام سرحدوں کا کنٹرول سنبھالے ہوئے ہے۔ اور اب وہ غزہ کے جنوب میں مصر کی جانب فلسطین کی آخری سرحد کا کنٹرول سنبھالنے کیلئے آپریشن کی تیاریاں کر رہا ہے۔ امریکی اخبار وال اسٹریٹ جرنل کی رپورٹ کے مطابق، اسرائیلی وزیراعظم بنجامن نتن یاہو اور دیگر حکومتی رہنماوں کا کہنا ہے کہ اسرائیل کیلئے ضروری ہے کہ فلسطینی علاقوں کے تمام بارڈرز کا کنٹرول اس کے پاس ہو۔ اسرائیل نے مصر کے ساتھ فلسطین کی اس سرحد کو ’’فلاڈیلفیا کوریڈور‘‘ کا نام دیا ہے۔ اس آپریشن کا مقصد حماس کو غزہ پٹی میں اسلحہ لانے سے روکنا ہے۔ اسرائیلی حکومت نے اس اقدام کو حماس کو شکست دینے کیلئے اپنی حکمت عملی کا حصہ قرار دیا ہے۔ تاہم، مصر اس ضمن میں پہلے ہی کہہ چکا ہے کہ ایسی کوئی بھی کوشش نقصان دہ ثابت ہو سکتی ہے اور یہ اقدام مصر کیلئے نہ صرف سرخ لکیر عبور کرنا ہوگا بلکہ مصر اسے اعلان جنگ تصور کرے گا۔ رپورٹ کے مطابق، مصر کے ساتھ سرحد پر اسرائیلی آپریشن بہت زیادہ پیچیدہ ثابت ہو سکتا ہے۔ اس ضمن میں اسرائیلی حکام نے مصر کو فلاڈیلفیا کوریڈور میں کیے جانے والے آپریشن کے حوالے سے آگاہ کر دیا ہے۔ اسرائیلی وزیراعظم کا کہنا ہے کہ اس بارڈر کا کنٹرول اسرائیل کے پاس ہونا چاہئے تاکہ ہم اسے بند کر سکیں، کیونکہ اس کے علاوہ کوئی اور بندوبست اس بات کی ضمانت نہیں دے پائے گا کہ آئندہ ایسے حملے نہیں ہوں گے