آرمی چیف جنرل عاصم منیر کی سیکریٹری جنرل اقوامِ متحدہ سے ملاقات
انٹر سروسز پبلک ریلیشنز (آئی ایس پی آر) کے مطابق آرمی چیف جنرل سید عاصم منیر نے اقوامِ متحدہ کے سیکریٹری جنرل سے ملاقات کی۔
آرمی چیف نے گفتگو میں خاص طور پر کشمیر اور غزہ کے جاری مسائل پر روشنی ڈالی۔
آرمی چیف جنرل سید عاصم منیر نے کہا کہ مسئلہ کشمیر سلامتی کونسل کی قرار دادوں اور کشمیری عوام کی امنگوں کے مطابق حل ہونا چاہیے، کشمیر کا دیرینہ تنازع حل ہونے تک جنوبی ایشیاء میں امن نہیں آ سکتا۔
آرمی چیف نے جموں و کشمیر کی حیثیت تبدیل کرنے کی یک طرفہ اور غیر قانونی بھارتی کوششوں کی مذمت کی اور کہا کہ یک طرفہ اور غیر قانونی بھارتی کوشش سلامتی کونسل کی قرار دادوں کی خلاف ورزی ہے۔
آرمی چیف جنرل سید عاصم منیر نے مسئلہ فلسطین پر پاکستان کے مؤقف کا بھی اعادہ کیا۔
آرمی چیف جنرل عاصم منیر نے کہا کہ مسئلہ فلسطین کا دیرپا حل دو ریاستی حل میں ہے، سیکریٹری جنرل غزہ میں جارحیت فوری رکوانے کے لیے عالمی برادری کو متحرک کریں۔
آرمی چیف نے دانستہ نشانہ بنائے جانے والے فلسطینیوں کی حالت زار پر گہری تشویش کا اظہار بھی کیا۔
اقوامِ متحدہ کے سیکریٹری جنرل نے آرمی چیف کی یو این ہیڈکوارٹر آمد پر ان کا پرتپاک خیرمقدم کیا اور شکریہ ادا کیا۔
یو این سیکریٹری جنرل نے عالمی امن و استحکام کے لیے پاک فوج اور قانون نافذ کرنے والے اداروں کے دستوں کے تعاون کو سراہا۔
علاوہ ازیں آرمی چیف نے سیکریٹری آف اسٹیٹ، ڈیفنس سیکریٹری اور ڈپٹی سیکریٹری آف اسٹیٹ سے بھی ملاقاتیں کیں۔
About Author
